МЕСЯЦ МАЙ. В 24-й ДЕНЬ.
ПРЕПОДОБНЫЙ СИМЕОН СТОЛПНИК, С ДИВНОЙ ГОРЫ
Некий юноша, именем Иоанн, прииде со своими родителями из Едессы во Антиохию. Хотеху бо родители его женити его, и узреша девицу красну, именем Марфу, и рекоша родителям ея, да дадут ю в жену сыну их. Родители девицы согласишася на сие, она же не хотяше брака, желающи быти невестою Христовою и девство свое нескверно соблюсти. Будучи же нудима от родителей ко браку, притече ко церкви Предтечевой, яже бе пред градом Антиохиею, и падши, моляшеся со слезами, да Господь устроит ей полезное. И бысть ей тамо видение Божественное, повелевающее ей покоритися родителем и сочетатися мужу. Девица же, преклонившися воли Господней, сочетася Иоанну. И бе ему не токмо помощница, но и наставница ко спасению, поощряющи его на всякое благое дело. Украшаху же живот свой постом, воздержанием и молитвою, тщащеся угодити Богу.
И часто честная Марфа притекаше ко церкви Предтечевой и моляшеся со многим усердием святому Иоанну, покровителю тоя церкви, да его молитвами исходатайствует ей у Бога дар родити отроча мужеска пола. Обещавашеся же, аще родит младенца, принести его Богу, якоже Анна принесе Самуила на службу. По едином же лете явися ей в нощней молитве, егда дремаше, святый Иоанн Предтеча в церкви своей, глаголя ей: «Дерзай, жено, яко молитва твоя приятна есть и получиши прошение твое. В знамение же благословения Божия да будет тебе сие благоухание». И даде ей святый Иоанн Креститель ком благовоннаго фимиама, глаголя: «Кади сим дом твой».
И пробудившися Марфа от дремания, обрете в руце своей той ком фимиама, егоже благоухание бе неизреченно. Потом паки явися ей Предтеча, глаголя: «Иди к мужу твоему, ибо зачнеши сына и наречеши имя ему Симеон. Он будет сосати млеко токмо от десныя перси, левыя же не прикоснется, ибо будет сын правды. Он не вкусит мяса, вина или иныя пищи, человеческим искусством уготованныя, но токмо хлеб, мед и соль; питие же его будет вода. Тебе же подобает хранити его со всяким тщанием в младенчестве его, якоже имущаго быти сосуд свят, на службу Господу Богу нашему. По двух же летах от рождения его, принесеши его семо, в церковь мою, и крестиши его. Егда же сподобится благодати святаго Крещения, тогда возвестится тебе, что имать быти младенец сей».
Марфа же, исполнившися страха и неизреченныя радости от того видения, воздаде великую благодарность Богу и святому Иоанну Предтече. Потом, возвратившися в дом свой к мужу своему, зачат младенца во чреве своем и, исполнившуся времени, роди безболезненно сына, егоже нарече Симеон и питаше его от десныя перси. Ино же время, хотящи уверитися воистинну о реченном ей в видении от святаго Иоанна Предтечи, яко младенец, иже имать родитися, не прикоснется левыя перси, приложи его к левой перси, он же, плача, отврати главу свою, не хотя сосати.
Потом сотворися и сие чудо: Аще же в некий день матерь его вкушаше мяса или вина, в той день младенец не хотяше сосати перси, но пребываше алчен до другаго дне; мати же, разумевши сию причину, воздерживашеся во вся дни от мяса и вина и питаше постом имущаго быти великаго постника.
Егда же младенец достиже возраста двух лет, родители его приведоша его в церковь Предтечеву, идеже и крестиша его. По Крещении же младенец абие рече сия словеса: «Имам отца и не имам отца; имам матерь и не имам матере». И повторяше сия словеса седмь дней сряду, о сем же дивляхуся яко родители, тако и вси слышащии его; и убо познаша его, яко имать быти последователь не земных, но небесных. По отдоении же младенца питашеся хлебом, медом и водою; мяса бо отнюдь не ядяше и никаковаго варения не хотяше приимати.
Егда же младенец бе пяти лет, бысть во Антиохии великое землетрясение, во время царствования великаго Иустиниана. В том землетрясении разрушишася множество домов, покрывших жителей своих; такожде разрушися и дом родителей его, и бывшаго внутрь токмо отца его уби. Мати же его жива остася, понеже в то время страшнаго землетрясения, по Божию Промыслу, не обретеся в дому, но отыде в некий дом помолитися. Младенец же такожде не бе дома, но бе в церкви святаго первомученика Стефана, и тамо, покрываемь Богом, остася неврежден.
И изшед младенец из церкви, не ведяше, камо ити, понеже мнози домы падоша, и не познаваше дому своего. И убо, идяше, блуждая по развалинам Антиохии, дондеже некая благочестивая жена, знавшая родителей его, узрев младенца Симеона блуждающа, взя его на рамена своя и отнесе на гору, яже бе близ града, идеже бе жилище ея.
Блаженная же Марфа, мати Симеонова, узрев дом свой разрушен и яко вси бывшии в нем не осташа живи, мняше, яко купно с мужем ея умре и младенец, сокрушен быв каменными стенами, и о сем зело скорбяше. По седми же днех явися ей святый Иоанн Креститель и рече ей, яко младенец ея жив есть и пребывает у некия жены вне града. Тогда она, шедши на ту гору, обрете Симеона у вышереченныя и знаемыя жены. Она же со удивлением рече матери его, яко во вся сия седмь дней младенец не хотяше вкусити никаковаго ядения, но токмо дважды прииде мало хлеба и воды. Взявши же мати сына своего, приведе его в церковь святаго Иоанна Предтечи и тамо воздаде благодарность Богу и святому, яко сохрани младенца ея жива.
В един же от дней Марфа помышляше в себе о видениях, явленных ей о младенце, и о дивных вещах, ныне с ним бывающих; и, не разумеющи, что имать быти последи с тем младенцем, усну и виде видение таковое: мняшеся видети себе окрыленну и летящу на высоту, держащу в руках младенца, возносящи его во благодати Господней и глаголющи: «Сыне, сим образом желах видети возвышение твое; да убо отпустит мя с миром Создатель мой, яко сподобившуюся быти благословенною в женах: ибо плод чрева моего отдаю Вышнему».
По сем мати пребываше со младенцем в неком месте во Антиохии, нарицаемом Херувим. Место же то тако нарицашеся, понеже Тит, сын Веспасиана, царя Римскаго, опустошив бранию Иерусалим, взя из церкви Иерусалимския два херувима злата, иже бяху на кивоте Завета, и принесе я во Антиохию: место же, идеже положени быша тии херувими, нарицашеся Херувим. Тамо пребывающи блаженная Марфа купно с сыном своим, младенец Симеон виде видение таковое: Видяше Господа нашего Иисуса Христа, седяща на престоле высоце и неизреченное множество праведных, собирающихся к Нему отовсюду; книги же животныя отверсты бяху, ибо суд творяшеся. На востоце же видеся Рай сладости, на западе же огнь геенский. И рече к нему Дух Святый: «Внемли, младенче, и разумей, яже зриши зде. Потщися угодити Богу, да сподобишися чести купно со святыми и да стяжеши неизреченныя благая, уготованная любящим Бога». От сего видения умудрися младенец Божественною премудростию и дадеся ему откровение неведомых и видение таин сокровенных.
По малых же днех узре мужа дивнаго видом, облеченна в ризу белу, глаголюща к нему: «Гряди по Мне!» И иде Симеон по нем. Муж же, явивыйся ему, приведе его в страны Тивериадския, яже суть близ Селевкии, и постави его на горе пустынней, под неюже бе село, нарицаемое Пиласа. Тамо, на горе пустынней, пребываше младенец со зверьми, якоже со агнцы, понеже токмо тех имеяше сожителями; от человек же отнюдь не видим бе. И бе просвещаем нощию и днем неизреченным светом; пища же приношашеся ему от того мужа, иже приведе его тамо, и иже, часто являяся ему, наставляше его во всем и даяше ему пищу во время.
По некоем же времени, наставлением тогожде мужа, взыде на верх горы и обрете малый монастырь, в немже бе игумен свят, стоящ на столпе, именем Иоанн. Тому игумену являхуся часто видения о Симеоне, имущем приити к нему. Иногда видяше младенца в ризе, грядуща с колесницею ко монастырю его, иногда же видяше его ходяща по воздуху и летяща над монастырем, иногда же стояща на столпе светлом и с тем столпом приближающася ко монастырю. Еще же видяше и ангела, показующа ему того младенца и глаголюща: «Сей есть, имже спасение обрящеши». Игумен же поведаше тая видения монахом, пребывавшим с ним. Егда же блаженный Симеон, по Божию наставлению, прииде в монастырь его, монаси дивляхуся, како толикий малый младенец, едва шести лет, возможе пройти толикия пустынныя места и обрести той монастырь.
Игумен же Иоанн, узрев его со столпа, позна абие младенца, ибо таковаго многажды видяше в видении. И возрадовася зело о пришествии его и, призвав его к себе, взя на руце и облобыза его, благодаря Бога со слезами. И бе младенец зело красен лицем, власы златовидны, очи светлы, показуя доброту души своея даже от взора своего. Бе кроток, молчалив, скор в ответе, мудр в словесех, исполнен небесных дарований, и пребываше особно, в безмолвии, в том монастыре. Пощение же его бе таково: иногда по трех днех, иногда по седми, иногда же по десяти днех ядяше сочевицу, водою размоченную, и пияше мало воды.
Блаженный же Иоанн, игумен столпник, дивляшеся зело о сем. И бе в том монастыре некий простец, пасый стадо. Той, узрев пощение младенца, превосходящее естество, исполнися зависти диавольския и хотяше убити его. Егда же восхоте начати то злое, в себе помысленное дело, абие усохну рука его и разболеся зело телом, яко бе при смерти. И не хотя, исповеда со покаянием грех свой, яко игумену, тако и блаженному младенцу Симеону. Младенец же, быв незлобив, не токмо прости ему той грех, но и помолися Богу о нем и, прикоснувшися руце его, абие исцели ю и сотвори его здрава всем телом.
От того времени игумен и братия почитаху зело сего блаженнаго младенца, яко того, егоже Господь избра от чрева матере его и освяти на службу Свою. По сем блаженный Симеон помолися, да созиждется ему столп близ столпа отца Иоанна. И абие, по желанию его, созидася ему столп близ столпа отца Иоанна, и тамо взыде младенец токмо седми лет, облечен быв в монашество преподобным Иоанном. Тако стояше тамо, последуя отцу своему, Иоанну Столпнику.
В начале же пребывания его тамо, явися ему Господь наш Иисус Христос в образе младенца, сияюща неизреченною красотою. И узрев Его святый Симеон, возгореся всем сердцем любовию к Нему, ибо позна Его, яко есть Владыка его. И убо, взяв дерзновение, рече: «Господи, како распяша Тя иудеи?» Господь же, простерши руце в образ креста, рече: «Тако распяша Мя иудеи, обаче Аз Сам восхотех распятися; ты же мужайся и крепися, распинаяся купно со Мною во вся дни». Оттоле угодник Божий забы тело свое и уподобися безплотным, имея живот ангельский. И тако превосхождаше в подвизе старца своего; ибо старец пояше во вся нощи тридесять псалмов, Симеон же пояше пятьдесят, иногда же и осмьдесят. И многажды совершаше всю Псалтирь в едину нощь, отнюдь не спя; и такожде славяше Бога весь день.
Старец же, видя его тако и бояся, да не како ослабеет от толиких подвигов, советоваше ему, глаголя: «Сыне, престани от толикаго труда, превосходящаго силу человеческую; ибо ни нам не даеши покоя. Довлеет тебе, яко от пелен распялся еси купно со Христом; и подобает тебе имети хотя мало попечения и о телеси твоем, оставити ему мало сна и даяти пищу с мерою, да возможет понести до конца труды пустыннаго жития. Ибо не сквернит человека пища и питие, понеже Господь глаголет во Святем Писании: Всяку зелень ядому, дах вам в пищу». Блаженный же Симеон отвеща старцу: «Аще и не сквернит пища человека, обаче раждает скверныя помыслы, омрачает ум, укореняет и утолщает страсть и претворяет человека духовнаго в плотскаго, пригвождая помысл к земным похотем; нам же, поучающимся день и нощь в законе Господни, подобает боятися, да не како похитимся когда прелестию сна и тако впадем в уныние, якоже глаголет пророк: Прильпе земли душа моя. И наипаче подобает с недремлющею бдением отверзати уста ко славословию Божию, да привлечем свыше дар Святаго Духа. Что же тебе, о отче, до словес моих? Аз себе единаго сия законы полагаю, а не иным, понеже мне потребно есть, да толикою строгостию утружду тело мое юное». И удивися старец такову ответу с добрым разумом младаго отрока.
И быв Симеон просвещаем светом Святаго Духа, открыся ему все царство диавольское и вся привидения, ибо виде самаго старейшину тьмы, седяща на престоле велицем и имуща венец сияющ на главе своей, сонмища же бесовская стояща пред ним. И видяшеся стояща пред ним вся украшения, уготованная на суетную прелесть: злато, сребро, камение многоценное и бисер; но вся та бяху яко грязь. Тамо слышахуся гласи труб, свирелей, волынок и различных музыкальных орудий. И видяшеся грех в образе девицы красныя, еяже последуяху яко раби, искусители, поощряющии и прельщающии ко греху. Тамо видяшеся дух лукавства, дух нечистоты, дух лености и дух сребролюбия, зияяй ненасытною устою и желаяй поглотити весь мир. Тии же дуси прелестнии тщахуся искусити и Симеона на грехолюбие, и призываху его ко греху словесы блудными, но он, оградив себе обычным оружием, сиречь знамением святаго Креста, и призывая имя Христово, отгна от себе привидения бесовския, якоже луч солнца отгоняет тьму.
И убо, воззрев ко Церкви, виде престол Божий, от негоже исхождаше слава Божия и сияше на Симеоне. От Церкве же послан бысть к нему един от патриархов, имея в руках некое миро благоуханное, еже, изливая на главу Симеона и помазуя его, рече ему: «Силою сего помазания изженеши диаволы; и, препоясався Божественною силою свыше, посечеши я тысящами и победиши. Дерзай убо, уповая на Создателя, ибо враг ничтоже успеет на тя и сын беззакония не возможет сотворити тебе никаковаго зла!» От того часа блаженный Симеон прииде силу над духами нечистыми и начат изгоняти я из человек и исцеляти всякия болезни.
В един же от дней раб Божий, Симеон Столпник, рече блаженному старцу своему, Иоанну Столпнику: «Отче, не многими денми прежде сего, яви ми Господь владычество сатаны и пагубныя его богатства. И видех коварства его, како тщашеся воздвигнути брань на благочестивых». Рече Иоанн Симеону: «Сыне, Бог да сохранит тя от коварств его». Симеон же рече: «Проклятая сила сатаны, аще и тщашеся прилежно измышляти злобы на нас, но ничтоже успевает». Старец же, видя, яко младенец ни во чтоже вменяет искушения вражия и, бояся, да не како впадет в возношение ума, рече к нему: «Сыне, нам же подобает боятися коварств диавольских многообразных и не уповати на благое дело наше, ибо враг наш облечеся в железныя обложения, уготовляя всегда сеть на младых монахов; и аще обрящет когда в них время угодное ему, абие нападает с силою, воздвигая брань тяжку в них. Нам же наипаче подобает молитися Богу и призывати Еммануила, да будет всегда с нами и да низложит всю силу вражию».
Сия им глаголющим между собою, услы сатана и, исполнившися ярости, скрежеташе зубы на юношу. Потом начат нападати со привидениями страшными на того, преобразуяся в змиев и лютых зверей и устремляяся на него день и нощь, якоже хотяй поглотити его. Блаженный же Симеон, прияв себе в помощь Вышняго и вооружився оружием святаго Креста, глаголаше: Не убоюся от страха нощнаго, от стрелы летящия во дни, от вещи во тме ходящия, от сряща и беса полуденнаго.
В едину же нощь месяца декабря, во вторую стражу нощи, диавол, собрав вся своя сонмища, нападе безвестно на него, сотворив шум велик. И убо, разорвав покров, иже бе над блаженным Симеоном, поверже его в пропасть; но рука Господня бе над младенцем, укрепляющи его. И стояше блаженный Симеон непоколебим не токмо телом, но и величием души, понеже не убояся нападения вражия. По сем диавол воздвиже от моря ветр силен и бурю, и ветр смущения, и сотвори страшныя громы и молнии, ударяя всю нощь в столп Симеонов. Преподобный же Иоанн, мня, яко Симеон убиен бысть от тех страшных громов, плакаше и призываше монахов ити и видети, жив ли есть младенец. Монаси же не отвещаша ему, отчасти, боящеся тех устрашений и не хотяще изыти из келий, отчасти же, понеже бяху подвизаеми диаволом с ненавистию на младенца, и глаголаху в себе: «Где ныне пощение того, превосходящее силу человеческую? Где подвиги его? Где чудотворения его? Да поможет себе сам ныне!»
Блаженный же младенец Симеон, услышав, яко старец плачет о нем, воззва к нему, глаголя: «Отче, не скорби о мне, ибо, покрываемь благодатию Христовою, не пострадах никаковаго зла; диавол же посрамлен есть». И бывшу утру, монаси идоша к столпу Симеонову, мняще обрести младенца мертва; но, узревше его жива, весела и светла лицем яко ангела Божия, посрамишася. И убо, поношени быша от старца Иоанна; и тако посрамившеся, отыдоша в келии своя. И услышав Ефрем, архиепископ Антиохийский, о блаженнем Симеоне, яко пребывает во житии строгом, прииде видети его. И узрев младенца юна, толико совершенна в добродетелех и распята купно со Христом, прослави Бога со слезами. Потом, возвратився в град, поведа всем на пользу о житии строгом в пустыни раба Христова.
И убо начаша мнози от монахов и от мирских приходити к нему; овии да видят его, друзии желающе насладитися беседы его Богодухновенныя; инии же, ищуще исцелений от болезней телесных от безмезднаго врача.
Единою же блаженный Симеон испроси от приходящих к нему ризу власяную, еюже облече втайне тело свое нагое. И изъяде та риза его до костей, изливашеся бо многая кровь из ран и, исполнившися крови, прильпе к телу и от сея причины плоть гнияше. Он же терпяше вся сия мужественно. Тогда начат исходити смрад от тела его гниющаго, братия же, восходящии к нему на столп, искаху ведати, откуду исходит той смрад и, обретше причину его, поведаша о сем отцу Иоанну. Он же, опечалився о таковом деле, повеле изъяти тихо ризу от тела Симеонова и укори его, да не творит телу своему толикаго жестокаго труда.
Блаженный же Симеон имеяше и дар учения, иже исхождаше яко река из уст его. И убо старец, призвав братию, повелеваше святому глаголати к ним слово учения, послушаяй и сам со сладостию. И убо младенец юный бе учитель премудрый и полезный монахом старым, ибо Дух Святый действоваше во устех его и вси дивляхуся дару премудрости, исходящему из уст его. Старец же нарицаше Симеона «новым Давидом» и поведаше видение о нем, еже имеяше во сне: «Видех некую силу Божественную, имущую в деснице сотовый мед и изжимающую его над главою младенца, мед же от сота течаше на главу его».
Иный же старец вопрошаше: «Суть ли голуби в столпе сем?» Братия же отвещаваху: «Не суть». Рече старец: «Аз видех голубя светоносна, летяща сквозе дверь внутрь к младенцу и по едином часе исходяща паки вон и летяща на небо». Сия им глаголющим между собою, блаженный Симеон прииде во изумление и виде себе восхищенна на высоту и пространно летяща яко окрыленна по всем странам мира. Потом возносим бе на седмь степеней, идеже, подобно святому апостолу Павлу, виде, яже око не виде и ухо не слыша, и паки сходя, вопрошаше ведущаго его: «Что суть сия, яже зриши?» Он же отвеща: «Сия суть седмь небес, к нимже восхищен был еси». Потом виде Рай, вертограды прекрасныя, палаты превеликия и пресветлыя и источник, из негоже истекаху мира. И не виде никогоже инаго тамо, токмо Адама и разбойника благоразумнаго. И пришед в себе, поведа сие видение старцу своему. Он же рече ему: «Сыне, благословен Господь, давший тебе дар таковый».
И убо младенец преуспеваше в пустыннических трудех. Егда прихождаше к нему кто наг, он совлекашеся ризы своея и даяше тому, сам же седяше наг. Сие творяше многажды, не токмо летом, но и зимою. Старец же, аще и не хотяше Симеон, облачаше его в ризу, да не умрет от стужи. Он же, бия себе в перси, плакаше, глаголя: «Увы мне, окаянному, како святии четыредесять мученицы претерпеша за Христа во езере стужу и лед, аз же не сподобляюся от сея малыя стужи оледенети? Како избегну вечнаго скрежета зубов и како стяжу причастие со святыми?» Тако скорбяше о сем много. Старец же, печаляся, глаголаше ему: «Что еще хощеши сотворити ты, Симеоне? Ты имаши токмо едину мысль, да убиеши себе самаго!» По некоем же времени Симеон обрете себе таковое мучение: стояше на ногах своих год весь, дондеже сгниюша бедры и голени его, и исхождаше велия смрад от него. Авва же Иоанн призва врача, хотя исцелити раны Симеоновы. Но Симеон, улыбаясь, рече: «Жив Господь мой, яко не прикоснется мне рука и помощь человеческая». Тогда Господь безвестно дарова ему здравие и воста цел обеими ногами и бедрами, не имея уже ни следа ран. О сем же, воздав благодарность Богу, стояше на коленях долгое время.
Пришедшу же празднику святых Пятидесятницы, в день предпразднства, блаженный Симеон рече преподобному Иоанну: «Отче, кто есть достоин прияти Святаго Духа, якоже прияша святии апостоли во огненных языцех?» Рече ему старец: «Не ищи вышних паче тебе и не испытуй неведомых, но еже ти повелено есть, то помышляй». Младенец же рече: «Писано есть: Волю боящихся Его сотворит и молитву их услышит и спасет их». Сия глаголя, возведе очи свои горе и помолися от всего сердца, глаголя: «Господи, Иже послал еси Святаго Твоего Духа на святыя Твоя ученики и апостолы, посли и на мя дар от благости Твоея и умудри мя, да научуся заповедем Твоим и глаголю словеса жизни вечныя, ибо силен еси совершити хвалу из уст младенец».
Тако молящуся ему, абие Дух Святый сниде с небесе на него яко свет пламенный. Тогда сердце его исполнися премудрости и разума и глаголаше многая от Божественнаго Писания; и никтоже можаше противитися премудрости духа, пребывавшаго в нем. И не токмо усты, но и писанием составляше словеса душеполезныя о монашеском житии, о покаянии, о воплощении Христове и о грядущем суде. И изъясняше многая неудоборазумныя от Святаго Писания; старец же дивляшеся зело о таковом даре Божием, иже бе в младом отроце и глаголаше: «На сем младенце исполнися, еже написа Давид: Слово Господне разжже его. Ныне познах, яко сей младенец творит чудная дела, не менее, мнится ми, нежели апостоли». И вси монаси дивляхуся и начаша боятися его, ужасающеся учения его и чудес, бываемых от него.
Нецыи же от тех монахов видеша в видении сна три храмины по три престолы, и три венцы бяху на престолах. И вопрошающим им: «Кому уготована слава та, яже зрится?» Слышася глас, глаголя: «Младенцу Симеону!» Симеон же, сияя яко солнце ангельским житием, направляше помысл свой от земных к небесным и, полагая восхождения в сердце своем, восхоте столпом высшим приближитися к небеси; и убо созидася ему ин столп, иже имеяше четыредесять степеней. Егда же хотяше Симеон взыти на той столп, услышаша о сем архиепископ Антиохийский и епископ Селевкийский, и приидоша в той монастырь со клиром своим. И возжегше свещи, взяша с добрым благоговением Божественнаго младенца Симеона и приведоша его первее в церковь, потом во святый алтарь, идеже хиротонисаша его во диакона. По сем возведоша его со псалмы и пении на столп высший.
И стояше святый Симеон на том столпе осмь лет; старец же плакаше, ибо не видяше лица его. Симеон же, стоя тамо, на столпе высшем, показоваше житие паче естества, уподобляяся херувимом, и непрестанно прославляше Бога. Но, да не похвалится всяка плоть пред Господем, по попущению Божию, воздвиже сатана на него тяжку брань телесную, хотя осквернити его привидением сна. Он же, противляяся крепце искушению, не даде сна очима своима, но моляшеся Богу со многими слезами, да будет ему помощник противу врага, возставшаго на него, и да осенит его в день брани. И виде мужа светла, честна и седа, сходяща свыше, облеченна в священныя ризы, имуща в руках потир с Божественными Тайнами Пречистаго Тела и Крове Господа нашего Иисуса Христа, и исполнися воздух неизреченнаго благоухания. И приближившуся к нему тому мужу, иже видяшеся светел, причасти его Святых Таин и рече ему: «Мужайся и да укрепится сердце твое, ибо отныне не будут тя смущати привидения во сне! Но токмо храни себе прилежно от помыслов твоих и уповай на Бога!» Святый же Симеон, исполнившися превеликия радости и неизреченныя сладости от того видения, хваляше Господа. Потом храняше себе яко от помыслов нападающих, тако и от словес человеческих; понеже во вся дни пребываше заключен до девятаго часа, не хотя беседовати ни с кем, токмо с Единым Богом.
Потом прииде блаженный конец старца его, преподобнаго Иоанна Столпника, егоже святый Симеон прежде видев, посла к нему, глаголя: «Не скорби, отче, аще услышиши о дне преставления твоего, ибо сей долг есть общий всем человеком. Аз познах, яко днесь призывает тя Христос на покой, да, по трудех, почиваеши со святыми. И убо, о отче, даждь ми благословение Авраамово и помяни мя, егда пойдеши поклонитися престолу славы Пресвятыя и Единосущныя Троицы, и помолися о нас, да и мы, победивше мир, стяжем небесное царство и да увидимся тамо друг со другом!»
Иоанн же, услышав сие, не усумнися, ниже ужасеся умом, яко готов сый на смерть, аще и здрав бе телом, не имея никаковаго недуга. Потом рече Симеону чрез посланнаго своего: «Сыне мой, да благословит тя Бог отец наших, Егоже взыскал еси, и Единородный Сын Отчий, Егоже возлюбил еси, и Животворящий Дух, Егоже возжелал еси. Едино Божество Святыя Троицы да будет тебе укрепление и защита! Тое да наставляет тя и утешает. Благословящии тя, благословенни будут, проклинающии же тя, прокляты будут. Бог да приложит тебе честь, понеже ты мене, духовнаго твоего отца, почтил еси яко отца твоего телеснаго. Мати твоя блаженная, яже послужи ми много, да обрящет благодать и милость от Господа». Братия же, стоящии пред старцем, услышавше словеса, яже глаголаше, ужасошася. Потом вопросиша его: «Что повелеваеши, отче, о юном Симеоне?» Старец отвеща: «Хощу, да вси будут последователи Симеону во любви пламенней сердца его к Богу, и да сподобятся помощи молитв того, иже есть сосуд избранный Божий, велик и честен».
И поучив авва Иоанн братию и помолився о них, сотворися якоже хотяй почивати мало и усну, яко объят сладким сном. Тако и предаде блаженный конец свой, не быв болен телом, и преставися ко святым отцем.
По смерти преподобнаго старца, святый Симеон предаде себе вящшим трудам. Чин же жития его бе таковый: От утра до девятаго часа моляшеся, по девятом часе упражняшеся в чтении и писании книг до захода солнца; по заходе же солнца начинаше молитву и тако пребываше всю нощь без сна, до утренния зари. Егда же светяшеся день, повелеваше сну, яко рабу, приближитися мало к нему; и приимаше его дремляща зело мало, потом паки воставаше и начинаше обычное правило свое. Во время же молитвы держаше в деснице своей фимиам, иже без углей огненных испущаше из себе дым кадильный.
Единою же слышася в воздухе народ мног, пояй купно с ним и глаголя «Аллилуиа»; тии же бяху святии ангели. И часто пребываше многия дни и нощи без сна. Единою же не спа отнюдь тридесять дней и тридесять нощей, моля Бога, да отъимет сон от него совсем; обаче Бог рече ему: «Подобает тебе спати нечто, да почиет мало тело твое».
Диавол же, не терпя видя таковаго подвига Симеонова, паки вооружися на него со всеми сонмищами своими и тщашеся устрашити его различными привидениями; понеже иногда преображахуся в змиев и в различныя звери, и устремляхуся, да угрызут его. Иногда же диавол претворяшеся в птицу необычную, имущую лице младенца и падаше к лицу его, иногда же являшеся во множестве воинства, грядущаго на него со криком великим яко на брань, хотяй низвергнути его долу и низложити столп его на землю. Единою же удари великим камнем в столп, яко преклонися столп, да падет; но сила Божия невидимая поддержа его и исправи. Единою же явися ему диавол яко девица арабская, черная и безстудная, яже тщашеся объяти руками своими выю святаго, и глаголаше ему: «Еще единожды поборюся с тобою и аще победиши мя, отъиду отсюду на время».
Вся же привидения и явления та бесовская святый отгоняше молитвою и знамением святаго Креста. И виде и видение Божественное зело чудное: мняшеся видети небо отверсто и Господа нашего Иисуса Христа, окруженна неизреченным сиянием, яко пламенем огненным; святии же архангели Михаил и Гавриил стояста окрест Его, един одесную, другий ошуюю, и под ногами их облак червленый. Сие узрев святый Симеон, поклонися Господу своему и, простерши руце к Нему, помолися, да, по благоволению Своему, даст ему принести плоды благия духовныя. Христос же Господь благослови Симеона трижды, знамением Божественных Своих перстов.
И воззрев Симеон долу, виде на лицы земли множество велико диаволов во мнозех образех: Овии яко вепри, друзии же яко козлища стадныя; и даде ему Господь власть над теми диаволами, да изгонит их. Якоже же укрепление тоя власти, сниде от Господа в руце его жезл финиковый; и абие все множество видимых диаволов побеже от лица Симеонова и сотворися невидимо. И убо святый изгоняше вся духи лукавыя из человек, приходящих к нему, и исцеляше всякия болезни и воскрешаше мертвых. Единою же, некий муж, емуже умре сын, прииде к столпу святаго и вопияше со слезами, моляся помиловати его и помолитися Богу о сыне своем умершем. Святый же, совершив молитву свою, рече тому мужу: «Иди во имя Господне, ибо сын твой жив есть!» И веровав муж той словесем святаго, отыде в дом свой и обрете сына своего воскресша из мертвых. И убо, взяв его, приведе к святому со неизреченною радостию и воздаде о сем благодарность Богу и угоднику Его.
По сем святый Симеон паки виде Господа Бога нашего, Емуже предстояху сонмища ангельская, из нихже первейшии держаху венец царский, украшенный драгоценными каменми, на верху егоже бе крест, сияяй яко молния; святии же ангели хотяху венчати Симеона на царство тем венцем. Но святый Симеон рече им: «Не отымите от мене сию власяницу, в нюже облекохся ради Христа». Ангели же рекоша ему: «Сего ради да имаши венец, уготованный тебе во царствии Христове и да облечешися яко в порфиру благодатию Святаго Духа; и воцаришися со святыми во царствии безконечном». Блаженный же Симеон, воззрев ко Господу, рече: «Господи, Создателю всех, понеже мене, недостойнаго, благоволиши сподобити славы святых Твоих во царствии Твоем, тогда молю благости Твоея, даждь ми отныне не причащатися пищи человеческия земныя». И услыша Господа, соглашающася на прошение его, и абие святии ангели, приближившеся, возложиша на пустынническую его власяницу ризу царскую пресветлую, и венчаша главу его венцем и воспеша гласом великим, глаголюще: «Славен и препрославлен есть Христос Бог, Царь небесе и земли; да будет убо хвалим Симеон, раб Его».
По сем видении святый Симеон не вкуси отнюдь пищи земныя до кончины своея, понеже питашеся пищею небесною, приносимою ему от ангел. Каковы же и колики чудеса сотвори святый Симеон и колико чудны бяху дела его, обретается написано пространно в книге жития его. Зде же поминаются малыя от многих чудес его, не продолжая словес, да не досадит чтущему и послушающему.
Единою же открыся святому Симеону вся злобы, имущия напасти на град Антиохию и на окрестныя его страны; ибо виде ангела, держаща меч в руце и летяща по воздуху над градом. И убо святый воззва к Богу, моляся о граде от всего сердца. И предста пред Господем, якоже иногда Моисей, моля Его отвратити гнев Свой от народа Своего. Господь же рече ему: «Се, вопль грехов града сего взыде предо Мною, гнев и ярость Мою подвигох на него; и убо погублю его за грехи его, посылая огнь, меч и смерть. Той Мя раздражи в беззакониих своих, Аз же предам его в пленение иноплеменником». Святый же поведа сие видение неким благочестивым мужем, приходящим к нему из града, и поощряше всех на покаяние.
И убо, не минувшу многу времени, Бог воздвиже стараго Хозроя, царя Персидскаго, иже бе дед Хозрою юнейшему, иже взя из Иерусалима древо животворящее святаго Креста. И убо прииде Хозрой с силою персидскою и халдейскою и поби великою бранию град Антиохию. Блаженный же Симеон, стоя на столпе, бе покрываем Богом и защищаем от варваров, напавших на ту страну. И убо святый моляшеся Господу прилежно, да отвратит гнев Свой от того града и да не предаст его в руце врагов, но не можаше умилостивити и утолити праведнаго гнева Божия.
И паки бысть святый в видении и, будучи в восхищении, виде пред собою крест пресветлый, а близ его два ангела, имущия в руках луки натянутыя и стрелы уготованныя на стреляние. Тии же ангели рекоша к нему, глаголюще: «Се, крест сей посла тебе Господь на защиту и яко знамение мира, яко не падеши под гнев Божий, иже нападе на сей град; стрелы же уготованы на изгнание врагов, приближающихся к сему месту твоему, ибо мы поставлены есмы хранити тя».
Паки виде Симеон в видении град взят и посреде его слышахуся врази, вопль, плач и рыдания великия. Тамо видяшеся, яко овии посекаеми мечем, друзии ведоми в плен, инии же бежаху, низвергающеся со стен града. Между бежащими видястася и два монаха из монастыря его, иже, боящеся нападения язычников, оставиша монастырь и гору и бежаша из града. И егда бежаху из града купно с иными человеки, виде их святый, како постижени быша и яти от варваров. И един убиен бысть мечем, другий же веден бысть в плен.
Сия вся, яже видена быша в видении святым Симеоном, исполнишася по малых днех, ибо град Антиохия взят бысть и опустошен мечем и огнем, и мног народ веден бысть в плен. Мнози же избегоша молитвами святаго Симеона от тоя лютыя опасности; понеже варвары, вшедше в град со многою силою, народ отверзе иныя врата от полунощи и полудне, не хранимая варварами, и бежаша тамо, инии же бежаху, низвергающеся со стен града.
И убо мног народ побеже на гору и в пустыню и бе храним милостию Божиею, кроме двух монахов, помянутых выше. Прихождаху же врази и на гору, на нейже бе монастырь и столп Симеонов, но возвращахуся тщи, ибо гора бе покрыта, якоже иногда покрыта бе гора Синайская мглою и облаком, яко не видяху столпа и монастыря. Инии же обращахуся и ужасахуся от силы невидимыя и тако бежаху вспять со страхом, якоже гоними множеством воинов вооруженных, понеже молитва святаго бе оружие страшное и непобедимое противником, и никтоже от бывших со святым на горе не постра зла от нападения варваров, кроме двух братий, иже бежаша в град от страха.
По отшествии же варваров, мнози раненые прихождаху к святому, и всем даяше исцеления. Иже же ведоми бяху в плен, тех святый избави от уз и от пленения, и молитвами своими освободи; ибо елицы поминаху имя святаго, будучи в плену, абие спадаху с них узы и оковы, и ходяще посреде варваров, невидими бяху и исхождаху из страны их без всякаго препятствия. Тако и брат вышепомянутый, егоже сотоварищ паде от меча, изыде из пленения с неким воином и глаголаше: «Егда помянухом отца и призвахом со слезами имя его, абие узы, яже бяху на нас, разрешишася сами собою и спадоша, мы же проидохом посреде варваров, никтоже от них вопрошая нас или препятствуя нам».
Некий старец, слеп очима, седяше прежде нападения варваров под горою близ пути, прося милостыни от проходящих. И напавшим безвестно варварам, един от них удари его мечем по выи, обаче не отсече главы его совсем, но сотвори ему токмо смертную рану. Тако старец той валяшеся в крови своей, едва имея мало духа жизни в себе. Видев сие святый Симеон очима своима прозорливыма, призва неких от братий и посла их взяти и привести к нему того старца. И убо, тии, шедше, взяша его на рогожу и приведоша пред столп. Святый же, взяв персть от земли и смешав ю со водою освященною, повеле приложити ю к ране старца, глаголя: «Во имя Еммануила, прилепися, главо, к месту твоему и укрепися». И абие, сим словом, прилепися глава старца на место и соединися со жилами его, и укрепися и исцелися та страшная рана, тако что старец начат глаголати. Еще же и очи его слепыя отверзошася и вси зрящии на то чудо ужасошася и прославиша Бога.
По неколиких же летех, преподобный Симеон скорбя о безпокойстве, понеже прихождаше к нему от всех стран множество народа безчисленное, приносяще больных своих и возмущая покой его, помысли оставити той столп, на немже стояше осмь лет, и преселитися инамо, в ино место безмолвнейшее. Оттуду же не бе далече иная гора высшая и пустынная совсем, понеже не бе в ней воды отнюдь и никтоже от человек не восхождаше тамо, ибо не бе удобовосходима, место же то бе жилище токмо змиев, четвероногих зверей и гадов ядовитых.
На ту гору помышляше святый Симеон преселитися и, егда помышляше он сия, явися ему Господь со множеством святых ангел, сходящ с небесе сквозе облак светел на ту гору и глаголя к нему: «Потщися, Симеоне, и взыди на сию гору Дивную; ибо тако наречется гора сия отныне, понеже на ней прославлю еще паче дар Мой в тебе!» И абие с тем гласом явися святому холм высок и камень на той горе, на немже стояста нозе Господни. И яко солнце осветися тое подножие от славы Господней и на том камени повелено бысть Симеону от Господа стояти.
По том видении, призвав преподобный братию, поведа им благоволение Господне преселитися на ину гору. И убо, устроив им игумена мужа стара и искусна, сниде оттуду и отыде на гору дивную, провождаемь братиями со слезами. И приближившеся к холму, явленному ему, ста и помолися много Богу. Егда же совершаше молитву, слышася глас множества ангел, вопиющих «Аминь». И убо святый повеле учеником своим поставити крест каменный на том месте, во незабвенное воспоминание гласа ангельскаго, иже слышася тамо. И убо, воззрев на верх горы, виде его сияюща славою Божиею и, взыдя с радостию на него, ста на том камени, на немже виде Господа в видении, призывающа его в то место. И имеяше блаженный Симеон тогда двадесять лет от рождения своего.
Но ни тамо не име покоя от приходящих, ибо на другий день народ прииде в монастырь его первый и, не обрет его, воздвиже плач велик. И убо, обрет народ, яко преселися святый на ину гору, отыде к нему со тщанием, приводя купно и больных своих, ихже узрев преподобный, опечалился, понеже ни тамо не оставляху его быти единаго с Богом. Обаче, видя слезы их, умилосердися и, возложив руце свои на каждаго болящаго, с призыванием имени Господня, исцели их и отпусти их здравых в домы своя.
В той горе обреташеся лев, иже срете человека, грядущаго к святому, и устремися на него, хотя убити и снести его. Человек же, не могий избегнути того зверя, воззва к нему, глаголя: «Ради Симеона, раба Божия, не вреди мене». И абие, лев, услышав имя Симеоново, укротися и, не сотворив никаковаго зла человеку, возвратися в ложе свое.
Человек же, пришед к святому, поведа ему, еже с ним бысть. И убо, боящеся прочии, слышащии сие, молиша святаго изгнати зверя из тоя горы, да не будет им страха, приходящим к нему. Преподобный же, призвав ученика своего, Анастасия, из негоже изгна седмь диаволов, рече ему: «Иди к пещере льва и рцы зверю: «Во имя Господне, глаголет тебе Симеон, раб Христов, да отъидеши от горы сея, ибо отныне не будет тебе жилища зде, да не устрашаеши братий, приходящих семо»». И шед Анастасий и обрет льва в ложе его, поведа ему словеса преподобнаго, глаголя якоже разумному человеку. Лев же, исполнив повеление, отыде оттуду в иныя места далекия и пустынныя, не вреждая никогоже от сретающихся на пути.
В то время, в той стране, по воли Божией умножишася многия болезни между человеки, яко мнози умираху. Святый же, познав гнев Божий на народ, моляшеся Господу со слезами, да помилует народ Свой и да отвратит от них гнев Свой праведный. И слышася к нему глас от Господа, глаголя: «Почто скорбит сердце твое о народе сем; еда ты любиши их паче Мене? Но понеже умножишася беззакония их, убо имат потребу и наказания. Обаче, да не опечалю тя, даю ти власть исцеляти вся болезни в них». Сие рече Господь рабу Своему, Симеону. Народ же, постигнутый болезнями, призываше, по Бозе, имя святаго Симеона, угодника Божия. И мнози видяху его в видении, посещающа домы их, осеняюща их крестом и дающа исцеления больным. И пробуждающеся от видений, ощущаху здравие, изгнаны бо бяху болезни их. Призывание же имени святаго Симеона между ними творяшеся тако: Возжигаху в домех своих кандила, полныя елея, кадяху фимиамом и моляхуся, глаголюще: «Христе Боже наш, молитвами раба Твоего Симеона, иже есть на горе дивней, помилуй нас». Тако стяжаваху они милость Господню. Иже же от них не имеяху елея довольно, тии изливаху мало елея в кандило и возжигаху е, и горяше неугасимо кандило их до третияго или четвертаго дне, якоже аще бысть елея довольно. Тако елей в кандилах их не умаляшеся, призыванием имени святаго Симеона.
В един же от дней открыся преподобному Симеону, яко кончина Преосвященнаго Ефрема, архиепископа Антиохийскаго, близ есть. И убо, призвав братию, поведа им о сем и повеле им молитися Богу, яко имать пасти велик столп Церкве. Они же глаголаху: «Мы слышахом, яко архиепископ здрав есть». В ин же день, в пяток по пении утрени, призвав братию, рече к ним со смирением: «Ефрем, архиерей Божий, умре в сию нощь, ибо видех душу его возносящуся на небо святыми ангелами и, быв близ мене, облобыза мя и рече ми: «Молю тя, помяни мя в молитвах твоих ко Господу»».
Сия глаголаше преподобный со слезами и рече: «Горе Антиохии, яко не имать уже Ефрема! Горе граду, яко взят бысть от него святый Ефрем!» И убо, по преставлении блаженнаго Ефрема, прииде на престол Домнин, иже прииде из Константинополя и иже бе немилостив к нищим. Преподобный же Симеон, уведав о сем, пророчествова ему наказание Божие. И убо, не по многу времени, Домнин, впад в болезнь, толико ссохнушася руце и нозе его, яко не можаше ни ходити, ни делати, но носим бе от других, якоже бревно.
Святому же открыся еще и о землетрясении, имущем быти во Антиохии, страшнейшем перваго. И возвещая сие приходящим к нему, плакаше и моляшеся Богу, да отвратит гнев Свой. В той же день, вечером, поколебася земля от землетрясения великаго и падоша стены града, здания же высокия и красныя уподобишася земли, тако что ужасеся весь народ от страха великаго, понеже мнози убиени быша от падших зданий. Прочии же вси, старии и юнии, притекоша к угоднику Божию с горы дивныя, моляще его со многими слезами, да его молитвами, приятными Богу, утолит гнев Его.
И убо, молящуся святому со усердием великим, преста землетрясение и виде небо отверсто от востока и исходящ оттуду свет неизреченный, знаменуя сим милосердие Божие, являющееся народу кающемуся. По сем, по повелению Божию, преподобный Симеон созида монастырь и церковь на Горе Дивней, руками человек, исцеленных им, ихже число бе зело велико. Потом испроси воды довольно на потребу монастыря и для приходящих; пшеницу же в житницах, молитвою его, толико умножи в изобилии, яко три лета не умаляшеся, аще и взимашеся довольно во вся дни, на сотворение хлеба потребнаго множеству человек, приходящих отовсюду.
И созида ин столп нов, к немуже прииде Сам Господь со святыми ангелами и освяти столп той. Потом праведник взыде на него со многою радостию и стояше тамо до блаженныя кончины своея. В год же тридесять третий возраста своего, по повелению Божию, приимшу чрез откровение, подвигнут бысть прияти хиротонию священства, юже прежде отнюдь не хотяше.
И убо, прииде к нему, по повелению Господню, Дионисий, епископ Селевкийский, и хиротониса его во иерея. Тако святый Симеон, быв освящен, совершаше с верою Божественныя Тайны, служа Богу безпорочно, яко ангел. И имеяше часто чудныя видения и откровения Божественныя, и прежде глаголаше и яже имуща быти. Он видяше прежде яже бяху далече, якоже аще быша пред ним, и прежде зряше дела и помыслы сокровенныя человек. И творяше чудеса безчисленныя на земли и на мори, явно и в видениях, слепыя просвещаше, прокаженныя очищаше, хромыя исправляше, бесы из безчисленных человек изгоняше, уста зверей заграждаше, вся раны и вся болезни исцеляше, воскрешая и неких мертвых. Тако исполнися в нем слово Христово: Веруяй в Мя, дела, яже Аз творю, и той сотворит. И убо, воистинну бе чуден Бог во святем Симеоне, чуднем рабе Своем, якоже показует особая книга, в нейже написано пространно житие его и чудеса его многая.
И убо, препроводив вся лета жития своего седмьдесят пять и предвидя преставление свое ко Господу, призва ученики своя и, познав их, яко имеяху многую жажду, но стыдяхуся вопросити его, будучи благоговейны, како живяше толико лет, не ядый яко человек отнюдь никаковаго ядения человеческаго, яви им тогда сие в час последний, яко отец чадолюбивый, да укрепит их еще паче к подвигам духовным и да имут упование на Бога.
И убо рече к ним: «Братия и чада моя, аз стяжах многая и великая благодеяния от Владыки моего, якоже весте. Между сими сподобихся великаго дара от милосердия Его, егоже вы не весте и хощу вам показати. Мнози бо лета суть, отнележе молих благость Божию, да избавит мя от брашен тленных. Како же повем милость и благость Твою, Христе, юже сотворил еси со мною, недостойным рабом Твоим! Видех, яко прииде из воздуха муж светел, облечен в ризу и украшение священническое, иже держаше в руках сосуд Божественный. Из того сосуда изымаше клещами и даяше ми трижды, обаче не вем, что бе сие брашно; токмо сие вем, яко сладко бе вкусом, бело и неизреченно видом. От того часа до днесь прихождаше той муж чудный во вся недели, по Божественней Литургии и даяше ми тое Божественное причастие, еже творяше в сердце моем насыщение и укрепление до другия недели и отнюдь не алках. Токмо сие имех сокровенно от вас, чада; вся же прочая весте, яко причастницы есте подвигов моих духовных. И убо, оставляю вам предания и правило мое и прошу от вас сие воздаяние: Да соблюдете сей залог мой цел и нерушим, якоже аще бысте видели мене. Да пребываете в добродетелех, якоже пребывасте, егда бех с вами, еже явится в день великаго воздаяния, егда получите кийждо по делом вашим».
Сия повеле преподобный Симеон учеником своим, да соблюдут я непоколебимо и да обрящут покой вечный во Царствии Небеснем. Потом, по еже глагола им и иныя многия словеса достопамятныя, в день 24-й мая преставися ко Христу, Желанному ему, да вселится во благая неизреченная и несказанная, яже уготова Ему и всем любящим Его и хранящим заповеди Его спасительныя. Честныя же и достопокланяемыя мощи его осташа тамо во святем его жилищи, на горе дивней, идеже соверши подвиги своя чудныя. Ученицы же его имут тая святыя мощи яко сокровище чудес, еже николиже оскудевает, но елико оскудевает, толико наполняется и умножаются исцеления, не токмо телесныя, но и душевныя, во Иисусе Христе Господе нашем, Емуже подобает всякая слава, честь и поклонение во веки веков. Аминь.